kab nishan mera kisi ko shab-e-hasti men mila
main to jugnu ki tarah apni hi muTThi men mila
bhaag nikla tha jo tufan se chhuḌa kar daman
sar-e-sahil vahi Duuba hua kashti men mila
aankh raushan ho to duniya ke andhere kya hain
rasta mahtab ko raton ki siyahi men mila
main jalata raha tere liye lamhon ke charagh
tu guzarta hua sadiyon ki savari men mila
tu ne mangton ko uchaTti hui nazren bhi na diin
haath phailaya na jis ne use jholi men mila
main ik aansu hi sahi huun bahut anmol magar
yuun na palkon se gira kar mujhe miTTi men mila
mahfilon men kiya logon ne ‘muzaffar’ ki talash
vo bhaTakta hua afkar ki vaadi men mila
Leave a Reply