Dhadakte Sans Lete Rukte Chalte Maine Dekha Hai

dhadakte saans lete rukte chalte main ne dekha hai

koi to hai jise apne men palte main ne dekha hai

tumhare khuun se meri ragon men khvab raushan hai

tumhari adaton men khud ko Dhalte main ne dekha hai

na jaane kaun hai jo khvab men avaz deta hai

khud apne-ap ko nindon men chalte main ne dekha hai

meri khamoshiyon men tairti hain teri avazen

tire siine men apna dil machalte main ne dekha hai

badal jaega sab kuchh badalon se dhuup chatkhegi

bujhi ankhon men koi khvab jalte main ne dekha hai

mujhe malum hai un ki duaen saath chalti hain

safar ki mushkilon ko haath malte main ne dekha hai

Leave a Comment