dekhte hi dekhte khone se pahle dekhte
raushni ko raushni hone se pahle dekhte
is tarah zaa.e.a hui hotin na ankhen niind men
ham ye saare ḳhvab agar sone se pahle dekhte
shahr ka a.ina-ḳhana hai sar-e-sailab-e-aks
apna chehra bhiiḌ men khone se pahle dekhte
ba.ad ka saara safar qaabu men rahta aap ke
ḳhaak ko gar be-karan hone se pahle dekhte
ab to jo kuchh hai sahafat hi sahafat hai yahan
jo bhi hona tha use hone se pahle dekhte
biij kis surat men bahar aa.ega kis ko ḳhabar
fasl kya hogi use bone se pahle dekhte
dekhte badal se barish tak safar taklif ka
tum miri ankhen agar rone se pahle dekhte
dekhne men der kar di aap ne ‘ehsas’ ko
ho chuka bas vo use hone se pahle dekhte
Leave a Reply