Dekh O Qatil Basar Karte Hain Kis Mushkil Se Hum

dekh o qatil basar karte hain kis mushkil se ham

charagar se dard-e-nalan dard se dil dil se ham

haae kya be-khud kiya hai ghaflat-e-umid ne

hal-e-dil kahte hain apna phir usi qatil se ham

rashk aada ne kiye raushan badan men ustukhvan

sham-e-mahfil ho ke utthe aap ki mahfil se ham

is ko kahte hain vafadari ki baad-az-qatl bhi

dagh-e-khun ho kar na chhute daman-e-qatil se ham

tuul thi rah-e-adam ghabra ke soe qabr men

paanv phailae thake jab duri-e-manzil se ham

jism-e-raushan se nazar aate hain jalve ruuh ke

husn-e-laila dekhte hain parda-e-mahmil se ham

khali az ehsan nahin ye bhi ki vaqt-e-iztirab

khush to ho jaate hain tere vada-e-batil se ham

aao aapas men samajh len ghair kaahe ko sune

tum kaho dil se hamare kuchh tumhare dil se ham

sun ke ro dete hain aksar surat-e-zakhm-e-jigar

aap sharmate hain apne khanda-e-batil se ham

rashk hai hasrat pe us ki dil men aata hai yahi

apne qalib ko badal len qalib-e-bismil se ham

sina-e-dil men hujum-e-dagh-e-hasrat hai ‘nasim’

phuul chun lete hain apne gulshan-e-hasil se ham

Leave a Comment