Jabbar Wasif
dayar-e-dard se aaya hua nahin lagta
main ahl-e-dil ko sataya hua nahin lagta
mira vajud jahan hai vahan shuhud nahin
main aa bhi ja.un to aaya hua nahin lagta
ye baat sach hai usi ne mujhe banaya hai
magar main kun se banaya hua nahin lagta
ye be-hijab falak aur ye be-libas zamin
mujhe to kuchh bhi chhupaya hua nahin lagta
hai barishon men milavaT ki gard ankhon men
koi bhi peḌ nahaya hua nahin lagta
miri plate men ḳhilqat ki bhuuk nachti hai
isi liye mujhe khaya hua nahin lagta
miri kamar pe lada hai anaaj bachchon ka
vo bojh hai ki uThaya hua nahin lagta
fasurda chehra shikasta qadam jhuki nazren
gharib baap kamaya hua nahin lagta
dhari hai jis pe tasalli ki degchi ‘vasif’
mujhe vo chulha jalaya hua nahin lagta
Leave a Reply