jazba-e-soz-e-talab ko be-karan karte chalo
ku-ba-ku raushan charag-e-karvan karte chalo
chashm-e-saqi pur-tabassum mai-kada bahka hua
aao qismat ko harif-e-kahkashan karte chalo
chhin laao asman se mehr-o-mah ki azmaten
aur TuuTe jhonpaḌon ko zau fashan karte chalo
zindagi ko log kahte hain bara.e-bandagi
zindagi kaT ja.egi zikr-e-butan karte chalo
jin se zinda ho yaqin o agahi ki aabru
ishq ki rahon men kuchh aise guman karte chalo
har nafas ai jiine vaalo shaghl-e-paimana rahe
be-ḳhudi ko zindagi ka pasban karte chalo
chheḌ kar ‘saghar’ kisi ke gesuon ki dastan
in shagufon ko zara sho.ala-zaban karte chalo
Leave a Reply