ahmad-nadeem-qasmi

Dawa To Kiya Husn-E-Jahan-Soz Ka Sab Ne

daava to kiya husn-e-jahan-soz ka sab ne

duniya ka magar ruup badhaya tiri chhab ne

tu niind men bhi meri taraf dekh raha tha

sone na diya mujh ko siyah-chashmi-e-shab ne

har zakhm pe dekhi hain tire pyaar ki mohren

ye gul bhi khilae hain teri surkhi-e-lab ne

khushbu-e-badan aai hai phir mauj-e-saba se

phir kis ko pukara hai tire shahr tarab ne

darkar hai mujh ko to faqat izn-e-tabassum

patthar se agar phuul ugaae mire rab ne

vo husn hai insan ki meraj-e-tasavvur

jis husn ko puuja hai mire sher o adab ne

More Poems

Leave a Comment