dasht-o-sahra phir se apnaen bhi kya
vahshaton ko apni samjhaen bhi kya
dard hi khvabon ka khamyaza sahi
duur dasht-e-dard se jaaen bhi kya
aur kuchh lamhe dubo den chaae men
yaar is garmi men ghar jaaen bhi kya
ye bahut kuchh to hai gardana tumhen
aur is se niche ab aaen bhi kya
faisla kar degi ik mauj-e-hava
dahti divaron ko ham dhaen bhi kya
shairi bazigari to hai nahin
shoabde yaron ko dikhlaen bhi kya
Leave a Reply