dasht-o-sahra men samundar men safar hai mera
rang phaila hua ta-hadd-e-nazar hai mera
nahin ma.alum, use us ki ḳhabar hai ki nahin
vo kisi aur ka chehra hai, magar hai mera
tu ne is baar to bas maar hi Daala tha mujhe
main huun zinda to miri jaan hunar hai mera
aaj tak apni hi tardid kiye jaata huun
aaj tak mere ḳhad-o-ḳhal men Dar hai mera
baghban aisa ki miTTi men mila baiTha huun
shaḳh-dar-shaḳh daraḳhton pe asar hai mera
sha.eri, ishq, gham-e-rizq, kitaben, ghar-bar
ka.i samton men ba-yak-vaqt guzar hai mera
Leave a Reply