dasht-e-taḳhaiyyulat men jab bhi safar hua
jaane kahan kahan se hamara guzar hua
logo ki talḳhiyon ka kuchh aisa asar hua
dil ke har ek goshe men raqs-e-sharar hua
us ki taraf se main to hua be-ḳhabar magar
meri taraf se vo na kabhi be-ḳhabar hua
bigḌi hai aisi shakl havadis ki maar se
hairan aa.ina bhi mujhe dekh kar hua
ik baar hi to kandhe pe rakkha tha us ne sar
phir aisa ittifaq kahan umr bhar hua
jis ki nazar men vus.at-e-ḳhvab-o-ḳhayal thi
us ka vajud markaz-e-ahl-e-nazar hua
pahle to ik makan ki surat hi tha faqat
tashrif aap laa.e to ghar mera ghar hua
us ko hamari dasht-navardi se hai ḳhushi
is se gharaz nahin ki koi dar-ba-dar hua
sab ki samajh men aata kahan hai ye ilm-o-fan
jis ne samajh liya use vo dida-var hua
‘rahbar’ tavil umr bhi jiine se faiz kya
kuchh maqsad-e-hayat na puura agar hua
Leave a Reply