Dasht-E-taKHaiyyulat Mein Jab Bhi Safar Hua

dasht-e-taḳhaiyyulāt meñ jab bhī safar huā

jaane kahāñ kahāñ se hamārā guzar huā

logo kī talḳhiyoñ kā kuchh aisā asar huā

dil ke har ek goshe meñ raqs-e-sharar huā

us kī taraf se maiñ to huā be-ḳhabar magar

merī taraf se vo na kabhī be-ḳhabar huā

bigḌī hai aisī shakl havādis kī maar se

hairān aa.ina bhī mujhe dekh kar huā

ik baar hī to kāñdhe pe rakkhā thā us ne sar

phir aisā ittifāq kahāñ umr bhar huā

jis kī nazar meñ vus.at-e-ḳhvāb-o-ḳhayāl thī

us kā vajūd markaz-e-ahl-e-nazar huā

pahle to ik makān kī sūrat hī thā faqat

tashrīf aap laa.e to ghar merā ghar huā

us ko hamārī dasht-navardī se hai ḳhushī

is se ġharaz nahīñ ki koī dar-ba-dar huā

sab kī samajh meñ aatā kahāñ hai ye ilm-o-fan

jis ne samajh liyā use vo dīda-var huā

‘rahbar’ tavīl umr bhī jiine se faiz kyā

kuchh maqsad-e-hayāt na puurā agar huā

Leave a Comment