darvazon par din bhar ki thakan tahrir hui
mire shahr ki shab har chaukhaT ki zanjir hui
sab dhuup utar ga.i TuuTi hui divaron se
magar ek kiran mere ḳhvabon men asiir hui
mira suuna ghar mire siine se lag kar rota hai
mire bhaa.i tumhen is baar bahut taḳhir hui
hamen ranj bahut tha dasht ki be-imkani ka
lo ghaib se phir ik shakl zuhur-pazir hui
koi hairat mere lahje ki pahchan bani
koi chahat mere lafzon ki tasir hui
is dard ke qatil-manzar ko ilzam na do
ye to dekhne vaali ankhon ki taqsir hui
kisi lashkar se kahin bahta paani rukta hai
kabhi ju-e-ravan kisi zalim ki jagir hui
phir lauh pe luTne vaale ḳhazane likhe ga.e
mujhe ab ke baras bhi daulat-e-jan taqdir hui
Leave a Reply