baitha hai mere samne vo
jaane kisi soch men pada hai
achchhi ankhen mili hain us ko
vahshat karna bhi aa gaya hai
bichh ja.un main us ke raste men
phir bhi kya is se faeda hai
ham donon hi ye to jante hain
vo mere liye nahin bana hai
mere liye us ke haath kaafi
us ke liye saara falsafa hai
meri nazron se hai pareshan
ḳhud apni kashish se hi ḳhafa hai
sab baat samajh raha hai lekin
gum-sum sa mujh ko dekhta hai
jaise mele men koi bachcha
apni maan se bichhad gaya hai
us ke siine men chhup ke ro.uun
mera dil to ye chahta hai
kaisa ḳhush-rang phuul hai vo
jo us ke labon pe khil raha hai
ya rab vo mujhe kabhi na bhule
meri tujh se yahi dua hai