darvaza koi ghar se nikalne ke liye de
be-ḳhauf koi rasta chalne ke liye de
ankhon ko ata ḳhvab kiye shukriya lekin
paikar bhi koi ḳhvabon men Dhalne ke liye de
paani ka hi paikar kisi parbat ko ata kar
ik buund hi naddi ko uchhalne ke liye de
sahmi hui shaḳhon ko zara si koi mohlat
suraj ki savari ko nigalne ke liye de
sab vaqt ki divar se sar phoḌ rahe hain
rauzan hi koi bhaag nikalne ke liye de
sailab men saa.at ke mujhe phenkne vaale
TuuTa hua ik pul hi sambhalne ke liye de
mahfuz jo tartib-e-anasir se hain asrar
to ḳhol ko ik aanch pighalne ke liye de
taḳh.il ko taḳhliq ki taufiq ata kar
phir pahlu se ik chiiz nikalne ke liye de
Leave a Reply