Raziya Subhan
dariyaon men rahte hue pyasa to nahin huun
pyasa jo hai muddat se vo sahra to nahin huun
kya janiye duniya men tiri huun ki nahin bhi
rahte hue maujud main khoya to nahin huun
vo saath mire chand sitara hai falak har
ai dost shab-e-hijr men tanha to nahin huun
tum vahm-o-guman jaan ke anjan na hona
ik Thos haqiqat huun main dhoka to nahin huun
chahe to vo sahil se kare ek ishara
main Duub raha huun abhi Duuba to nahin huun
tha faisla is tark-e-vafadari ka baham
tum bhuul ga.e main tumhen bhola to nahin huun
hairat se bhala kyon mujhe takta hai zamana
ai parda-e-aflak tamasha to nahin huun
Leave a Reply