dard sulgaya gaya aanch baḌha li ga.i hai
jaan ThiThure hue rishton ki bacha li ga.i hai
ghar ki dahliz pe lauTa hai pasheman koi
dasht sab chhan liye ḳhaak uḌa li ga.i hai
ain mumkin tha chhalak jaate hamare aansu
sa.at-e-gham baḌi tarkib se Taali ga.i hai
rasta kar diya hamvar kisi ka ham ne
ek divar-e-ana thi jo gira li ga.i hai
raas aa.i na kabhi gosha-nashini ‘nusrat’
barha yuun miri tanha.i khangali ga.i hai
Leave a Reply