Dard Ko Ashk Banane Ki Zarurat Kya Thi

dard ko ashk banāne kī zarūrat kyā thī

thā jo is dil meñ dikhāne kī zarūrat kyā thī

ham ne jo kuchh bhī kiyā apnī mohabbat meñ kiyā

go samajhte haiñ zamāne kī zarūrat kyā thī

ho jo chāhat to Tapak paḌtī hai ḳhud āñkhoñ se

ai mire dost batāne kī zarūrat kyā thī

itne hassās haiñ sāñsoñ se pighal jaate haiñ

bijliyāñ ham pe girāne kī zarūrat kyā thī

aise lagtā hai ki kamzor bahut hai tū bhī

jiit kar jashn manāne kī zarūrat kyā thī

Leave a Comment