Dard Ki Dhup-Bhare Dil Ki Tamazat Le Kar

dard kī dhūp-bhare dil kī tamāzat le kar

kaise jaa.e koī ehsās kī hijrat le kar

phir kahāñ jā.iye ab baiThiye mātam kiije

dil ke hāthoñ meñ ye anmol sharāfat le kar

kyā kaheñ ab to nikalnā bhī bahut mushkil hai

apne kāñdhe pe ḳhud apnī hī zamānat le kar

peT kī bhuuk tamāshe pe tamāsha kar le

ham thakeñge nahīñ is bhuuk kī aadat le kar

apne bistar pe kisī raat hameñ niiñd aatī

aur phir ḳhvāb nahīñ aate zarūrat le kar

dekhiye sochiye mahsūs to hone diije

dard kī dhuup meñ ehsās kī lazzat le kar

Leave a Comment