nibhegi kis tarah dil sochta hai
ajab laḌki hai jab dekho ḳhafa hai
ba-zahir hai use bhi pyaar vaise
dilon ke bhed se vaqif ḳhuda hai
ye tanha.i ka kaala sard patthar
isi se umr-bhar sar phoḌna hai
magar ik baat donon jante hain
na kuchh us ne na kuchh ham ne kaha hai
nahin mumkin agar saath umr-bhar ka
ye pal-do-pal ka milna kya bura hai
ghane jangal men jaise shaam utre
koi yuun ‘ja.afari’ yaad aa raha hai
Leave a Reply