Ashfaq Husain
kahin bhi ja ke basera karen udhar hi ke hain
hamare saare havale hamare ghar hi ke hain
hamari saans talak hi hamara virsa hai
hamare ḳhvab bhi ankhon men raat bhar hi ke hain
main in se TuuT ke karta huun pyaar kyuun na karun
ye saare phuul ye patte mire shajar hi ke hain
vo jis ko chahe bana de kalam-e-fan ki misal
tamam mo.ajize us dast-e-kuza-gar hi ke hain
tiri nazar se tire dil tak aane jaane men
jo fasle hain vo lagta hai umr bhar hi ke hain
karun to kaise karun main tiri gali men qayam
mire to jo bhi sitare hain vo safar hi ke hain
Leave a Reply