dard jab ishq men ma.il-ba-fughan hota hai
vahi aalam to tabi.at pe garan hota hai
mo.ajiza ishq ka us vaqt ayaan hota hai
us ki tasvir pe jab apna guman hota hai
ab to har bazm men haal apna bayan hota hai
kaun ab kis ke liye girya-kunan hota hai
jab kabhi tazkira-e-gul-badnan hota hai
rahguzaron pe baharon ka guman hota hai
chandni raat men jab hote hain vo mere qarib
vahi aalam to mohabbat men javan hota hai
kis qadar pi hai kahan pi hai kahan tak pi hai
piine vaale ko ye ehsas kahan hota hai
haan vahi ‘varsi’ kahte hain jise aap ‘aziz’
koi bhi bazm ho vo pir-e-mughan hota hai
Leave a Reply