qateel-shifai

Dard-E-Mushtarak

main ne jo zulm kabhi tujh se rava rakkha tha

aaj usi zulm ke phande men giraftar huun main

main ne jo tiir tire haath se chhina tha kabhi

aaj usi tiir ke ghaav se nigun-sar huun main

jis ki khatir tiri zillat bhi gavara thi mujhe

aaj usi ”paikar-e-ismat” ka khata-kar huun main

miri aankhon ne jise chand kaha tha kal tak

aaj usi shoala-e-parran se araq-bar huun main

tu na chahe bhi to afaq hansega mujh par

vaqt ke haath men tuuti hui talvar huun main

main ne chaha tha ki insan ki azmat ke liye

ek mazlum javani ko sahara de duun

ek thukrae hue pyaar ke sadme bantun

ek bhatke hue raahi ko ishara de duun

ek jhulse hue ehsas ko thanDak bakhshun

aur kaunain ko phir zauq-e-nazara de duun

main ne ikhlas ke phulon se banae gajre

main ne ikhlas ke phulon se banae gajre

main ne ehsas ke jhulon men jhulaya us ko

main ne rondi hui rahon pe bichhai anhken

main ne paigham sitaron ka sunaya us ko

main ne aflas ke dariya ka tamavvuj pi kar

ik nai aas ke sahil pe lagaya us ko

aaj main soch raha huun shab-e-tanhai men

kis qadar talkh javani ki luti yaden hain

dekh is daur men aivan-e-mohabbat ke liye

kaisi kaisi gham-o-andoh ki buniyaden hain

kal tire dida-e-hairan se lahu phuta tha

aaj mere lab-e-khamosh pe fariyaden hain

ye mohabbat ye vafaen ye muravvat ye khulus

in ko sarmae ne be-kar bana rakkha hai

husn aur husn ke har ek sanam-khane ko

zar-paraston ne jafakar bana rakkha hai

aa ki us daur ka meaar badalna hai hamen

jis ne har zehn ko bimar bana rakkha hai

aa ki us jins-e-giran-qadr ko bedar karen

jis ne ham sab ko kharidar bana rakkha hai

aa ki us fitna-e-zarposh ko uryan kar den

jis ne afaq ko bazar bana rakkha hai

More Poems

Leave a Comment