dard dekhen na ab dava dekhen
marne valon ka hausla dekhen
kuchh nahin ishq men ba.iid miyan
raushni chhuen aur hava dekhen
jab na dekha use to kya dekha
dekh kar us ko aur kya dekhen
jo na dekha tha vo bhi dekh liya
ab dikhata hai kya ḳhuda dekhen
ham men koi mushabahat bhi hai
aa.iye mil ke aa.ina dekhen
ye mohabbat to shai hi aisi hai
aap bhi apna fa.eda dekhen
main palaT ja.un apne ghar ki taraf
aap bhi apna rasta dekhen
kya khule un pe ishq jo ‘saifi’
shahr se dasht ko juda dekhen
Leave a Reply