dil men bikhre hue jalon se pareshan na ho
mere guzre hue salon se pareshan na ho
meri avaz ki talḳhi ko gavara kar le
mere gustaḳh savalon se pareshan na ho
main ne maana tiri ankhen nahin khulti hain magar
din nikalne de ujalon se pareshan na ho
apni zulfon men utarti hui chandi ko chhupa
mere bikhre hue balon se pareshan na ho
ai na.i dost main bharpur hua huun tera
mere maazi ke havalon se pareshan na ho
dekh yuun duur na ho mujh ko laga le dil se
tu miri ruuh ke chhalon se pareshan na ho
ḳhud ko viran na kar mere liye jaan miri
in pareshan ḳhayalon se pareshan na ho
Leave a Reply