dar-e-imkan se guzar kar sar-e-manzar aa kar
ham ajab lahar men hain apne na.e ghar aa kar
jise jaana hi nahin apne kinaron se juda
use dekha bhi nahin mauj se bahar aa kar
atish-e-gham pe nazar ki hai kuchh aise ki ye aanch
baat kar sakti hai ab mire barabar aa kar
tu ne kis harf ke ahang men Dhala tha mujhe
saans bhi TuuT raha hai sar-e-mahzar aa kar
use dekha tha ḳhat-e-ḳhvab ke us paar kabhi
ye sitara jo gira hai mire andar aa kar
ik sada koh-e-nida se kisi apne ki sada
rone lag jaati hai is dasht men aksar aa kar
shaḳh-ta-shaḳh ajab alam-e-vahshat hai abhi
ta.ir-e-jan kabhi Thahra tha mire ghar aa kar
Leave a Reply