dam-e-sub.h andhiyon ne jinhen rakh diya masal ke
vahi nanhe nanhe paude the ghane daraḳht kal ke
na.e sathiyon ki dhun men tiri dosti ko chhoḌa
koi tujh sa bhi na paaya tire shahar se nikal ke
vahi rasm-e-kam-nigahi vahi raat ki siyahi
mire shahar ke charagho yahan kya karoge jal ke
na.e ḳhvab meri manzil tah-e-ab mera sahil
tumhen kya milega yaaro mire saath saath chal ke
sar-e-sham aaj koi mire dil se kah raha hai
koi chand bhi to nikle koi jaam bhi to chhalke
ye jo ghar luTa luTa hai ye jo dil bujha bujha hai
isi dil men rah ga.e hain ka.i aftab Dhal ke
ye mushahida hai mera rah-e-zindagi men ‘basir’
vahi munh ke bal gira hai jo chala sanbhal sanbhal ke
Leave a Reply