dam-ba-ḳhud meri ana teri ada bhi dam-ba-ḳhud
tere pahlu men raha main aur raha bhi dam-ba-ḳhud
dekhiye pahle lahu Tapke ki phailen kirchiyan
dam-ba-ḳhud teri nazar bhi aa.ina bhi dam-ba-ḳhud
itna sannaTa ki jaise avvalin sham-e-firaq
dam-ba-ḳhud hai asman bhi aur hava bhi dam-ba-ḳhud
yaad hai tujh ko vo pahle lams ki hiddat ki jab
rah ga.i thi daf.atan teri haya bhi dam-ba-ḳhud
ek se aalam men donon muḳhtalif asbab se
dam-ba-ḳhud tera karam meri dua bhi dam-ba-ḳhud
aisa lagta hai ki donon se nahin nisbat mujhe
dam-ba-ḳhud umr-e-ravan sail-e-fana bhi dam-ba-ḳhud
ḳhauf-e-tajdid-e-ta.aluq darmiyan haa.il raha
dam-ba-ḳhud tera sitam mera gala bhi dam-ba-ḳhud
yuun guman hota hai donon ki tavaqqo.a ek thi
dam-ba-ḳhud teri vafa meri saza bhi dam-ba-ḳhud
jab khule meri haqiqat tum vo manzar dekhna
dam-ba-ḳhud na-ashna bhi ashna bhi dam-ba-ḳhud
Leave a Reply