Farasat Rizwi
dam-ba-dam taghayyur ke rang hain zamane men
kuchh kami nahin aati dard ke ḳhazane men
ghair ki shikayat kya shauq-e-lazzat-e-gham se
main bhi ho gaya shamil apna dil dukhane men
mere chaar janib the ḳhar-zar nafrat ke
umr kaT ga.i meri rasta banane men
vaqt ne un ankhon ke ḳhvab hi badal Daale
der ho ga.i tujh ko mere paas aane men
chiḳhte the ham-sa.e ik ajiib lazzat thi
dhuup men khaḌe ho kar aa.ina dikhane men
ta.eron ko aisi bhi kya thi ujlat-e-parvaz
bhuul kar chale aa.e ḳhvab ashiyane men
thi hava bhi shorida haath bhi the larzida
ungliyan jala Dalin ik diya jalane men
daam aur qafas Thahre qissa-ha-e-parina
qaid kar diya us ne mujh ko ab-o-dane men
bam-o-dar ‘farasat’ ab kya hamen ḳhushi denge
zindagi basar kar di gham ke shamiyane men
Leave a Reply