Shahzad Nayar
dam-ba-dam gardish-e-dauran ka ghumaya hua shaḳhs
ek din hashr uThata hai giraya hua shaḳhs
main to ḳhud par bhi kifayat se use ḳharch karun
vo hai mahnga.i men mushkil se kamaya hua shaḳhs
yaad aata hai to aata hi chala jaata hai
kar-e-bekar zamane men bhulaya hua shaḳhs
dasht-e-be-ab men avaz na alfaz kahin
har taraf dhuup thi phir peḌ ka saaya hua shaḳhs
jab zarurat thi usi vaqt mujhe kyuun na mila
bas isi zid men ganva baiTha huun paaya hua shaḳhs
kya ajab ḳhvan-e-muqaddar hi uTha kar phenke
DaanT kar ḳhvan-e-muqaddar se uThaya hua shaḳhs
apni shorida-mizaji ka karun kya ‘nayyar’
ruuTh kar ja bhi chuka maan ke aaya hua shaḳhs
Leave a Reply