Collage Ka dalan Nahin Hai Pyare Zalim duniya Hai

Aftab Shakeel

collage ka dalan nahin hai pyare zalim duniya hai

aur yahan sach bolne vaala sach men sab se jhuta hai

main tere didar ki khatir aa jaata huun khvabon tak

varna is lazzat ke alava nindon men kya rakkha hai

chamkile kapdon se parkha mat kar insani lahje

gahre kuuen men ujla paani khara bhi ho sakta hai

vaada kar ai dilkash ladki vasl se le kar hijr talak

rishta chahe jaisa bhi ho kharcha apna apna hai

main tere shikve bhi janan bilkul aise sunta huun

jaise bachpan men koi bachcha ghaur se qisse sunta hai

mere khafa hone par us ka vo ulta filmi jumla

pyaar se dar nahin lagta sahab thappad se dar lagta hai

jab logo ne saudai ki laash utari tab bole

ye to zinda mar hi chuka tha pankhe se kyuun latka hai

main is dar se coffē piine tere saath nahin jaata

tujh ko to coffē ke bahane mujh se ladna hota hai

mujh ko bone the dil men aur kisi ke gham ‘afi’

lekin dil ki surkhi zamin par ab tak us ka qabza hai