afzal-gauhar-rao

Chup-Chap Nikal Aae The Sahra Ki Taraf Hum

chup-chap nikal aae the sahra ki taraf ham

chalte hue kya dekhte duniya ki taraf ham

pamal kiye jaati hai is vaste duniya

baithe hain tire naqsh-e-kaf-e-pa ki taraf ham

kis pyaas se khali hua mashkiza hamara

dariya se jo uth aae hain sahra ki taraf ham

kya chahti hai niyyat-e-bazar-e-zamana

khinchte chale jaate hain jo ashiya ki taraf ham

ye ajnabi logon ki zara bhiid chhate to

jaenge kisi apne shanasa ki taraf ham

‘gauhar’ ye zamin ham ko bahut yaad karegi

uth jaenge jab alam-e-bala ki taraf ham

More Poems

Leave a Comment