ye himaqat mire idrak pe chha.i hui hai
ansuon se tire tasvir bana.i hui hai
arsh hilne ka sabab puchhte kya ho mujh se
ik dua halqa-e-tasir men aa.i hui hai
chand maddham hai diye chup hain sahar ruuTh ga.i
kya mire gham men giraftar ḳhuda.i hui hai
tum to bas tark-e-ta.alluq ke liye aa hi ga.e
ab ke is dil ne magar baat baḌha.i hui hai
munkashif hone laga ḳhuun hatheli pe mire
ek laḌki ki hatheli jo hina.i hui hai
itni vahshat ki havas vajd men aane se rahi
ik sada janib-e-aflak se aa.i hui hai
chhu luun honTon se to dariya ko bhi sahra kar duun
pyaas teri mire honTon pe sama.i hui hai
shahar-e-viran ab abad hua chahta hai
aaj is panchhi ki pinjre se riha.i hui hai
barish-e-ashk men bah ja.ega ab shahr ka shahr
aaj ‘afaq’ koi chiiz para.i hui hai
Leave a Reply