chup bhi ho bak raha hai kya vaaiz
maghz rindon ka kha gaya vaaiz
tere kahne se rind jaenge
ye to hai khana-e-khuda vaaiz
allah allah ye kibr aur ye ghurur
kya khuda ka hai dusra vaaiz
be-khata mai-kashon pe chashm-e-ghazab
hashr hone de dekhna vaaiz
ham hain qaht-e-sharab se bimar
kis maraz ki hai tu dava vaaiz
rah chuka mai-kade men saari umr
kabhi mai-khane men bhi aa vaaiz
hajv-e-mai kar raha tha mimbar par
ham jo pahunche to pi gaya vaaiz
dukht-e-raz ko bura mire aage
phir na kahna kabhi suna vaaiz
aaj karta huun vasf-e-mai main ‘amir’
dekhun kahta hai is men kya vaaiz
Leave a Reply