ahmad-ali-barqi-azmi

Dar-Ba-Dar Phirta Tha Jab-Tab Tujhe Aabaad Kiya

dar-ba-dar phirta tha jab-tab tujhe abad kiya

kya bigada tha tira kyuun mujhe barbad kiya

jis tarah karta hai tu khun-e-tamanna mera

kya kabhi main ne bhi aise tujhe nashad kiya

zakhm jo tu ne diye the hain abhi tak taaza

jab chali sard hava main ne tujhe yaad kiya

is se behtar tha ki tu qaid hi rakhta mujh ko

par katar kar mira kyuun baagh men azad kiya

zindagi khel nahin hai jise bachchon ki tarah

kabhi abad kiya aur kabhi barbad kiya

zeb deta hai tujhe mufsid-e-dauran ka khitab

narava tha jo vo kyuun ai sitam-ijad kiya

baghban jis ko banaya tha usi ne ‘barqi’

sahn-e-gulshan men bapa nala-o-fariyad kiya

More Poems

Leave a Comment