chot dil ko jo lage ah-e-rasa paida ho
sadma shishe ko jo pahunche to sada paida ho
kushta-e-tegh-e-judai huun yaqin hai mujh ko
uzv se uzv qayamat men juda paida ho
ham hain bimar-e-mohabbat ye dua mangte hain
misl-e-iksir na duniya men dava paida ho
kah raha hai jaras-e-qalb ba-avaz-e-buland
gum ho rahbar to abhi rah-e-khuda paida ho
kis ko pahuncha nahin ai jaan tira faiz-e-qadam
sang par kyuun na nishan-e-kaf-e-pa paida ho
mil gaya khaak men pis pis ke hasinon par main
qabr par boen koi chiiz hina paida ho
ashk tham jaaen jo furqat men to aahen niklen
khushk ho jaae jo paani to hava paida ho
yaan kuchh asbab ke ham bande hi muhtaj nahin
na zaban ho to kahan nam-e-khuda paida ho
gul tujhe dekh ke gulshan men kahen umr daraz
shakh ke badle vahin dast-e-dua paida ho
bosa manga jo dahan ka to vo kya kahne lage
tu bhi manind-e-dahan ab kahin na paida ho
na sar-e-zulf mila balbe darazi teri
rishta-tul-e-amal ka bhi sira paida ho
kis tarah sach hai na khurshed ko rajat ho jaae
tujh sa afaq men jab mah-laqa paida ho
abhi khurshed jo chhup jaae to zarrat kahan
tu hi pinhan ho to phir kaun bhala paida ho
kya mubarak hai mira dast-e-junun ai ‘nasikh’
baiza-e-bum bhi tuute to huma paida ho
Leave a Reply