chitvan ki kahun ki isharat ki garmi
hai nam-e-khuda us men har ek baat ki garmi
rone se mire us ko araq aa gaya yaaro
sach hai ki buri hoti hai barsat ki garmi
tuk phuul chhua tha so nazakat se kai baar
rah rah ke dikhai mujhe gul-hat ki garmi
khulvate hi bundon ke badan garm ho aaya
shayad ki lagi us ko mire haat ki garmi
jalta huun main aur shoale nahin dete dikhai
hai ishq men yaaro ye tilismat ki garmi
rahna hai koi din to samajh jaiyo ai dil
yaan phir vahi thahri hai mulaqat ki garmi
garmi thi kahin aah ham afsurda-dilon men
saaqi ki faqat hai ye inayat ki garmi
aate hi jo tum mere gale lag gae vallah
us vaqt to is garmi ne sab maat ki garmi
kahta hai vo jis dam ki chalo ham se na bolo
is baat men hai aur hi ek baat ki garmi
sab poch hai zahir ki ye shokhi-o-shararat
maashuq men jab tak ki na ho zaat ki garmi
tum ghussa ho ya qahr ho atish ho ghazab ho
ab ham ne ye sab dil pe musavat ki garmi
ya-hazrat-e-dil tum to bade sahib-e-dil the
rakhte the bahut apne kamalat ki garmi
ek hi nigah-e-garm se bas ho gae tum sard
ab kahiye kahan hai vo karamat ki garmi
yuun garmi-e-sohbat to bahut hogi ‘nazir’ aah
par yaar na bhulegi mujhe raat ki garmi
Leave a Reply