Ghulam Rabbani Taban
chhaTe ghubar nazar bam-e-tur aa jaa.e
piyo sharab ki chehre pe nuur aa jaa.e
uThao jaam ba-nam-e-hayat bada-kasho
nazare jhumen nazar ko surur aa jaa.e
sharab-ḳhane men kausar ka zikr kya kahiye
kisi ki aql men jaise futur aa jaa.e
tamam zohd-o-riyazat ho gharq-e-mauj-e-sharab
jo mai-kade men vo shaida-e-hur aa jaa.e
maqam-e-dar se guzro to zindagi paao
piyo jo zahr-e-halahal surur aa jaa.e
nigah tez nafas garm aarzu bebak
jise ho naaz hamare huzur aa jaa.e
ye karobar-e-mashiyyat bhi ḳhuub hai ‘taban’
kisi pe barq gire zad pe tuur aa jaa.e
Leave a Reply