chashm men kab ashk bhar laate hain ham
raat din moti hi barsate hain ham
jabki vo tir-e-nigah khate hain ham
sahm kar bas sard ho jaate hain ham
jins-e-dil ko chhod mat ai zulf-e-yar
hai ye sauda muft thahrate hain ham
naseha dast-e-junun se kaam hai
kab ye chak-e-jeb silvate hain ham
is qadar mat kar shararat shoala-khez
teri in baton se jal jaate hain ham
kaun kahta hai na kiije imtihan
gar abhi kahiye to mar jaate hain ham
khat but-e-nau-khat likhe hai ghair ko
pech-o-tab is vaste khate hain ham
kholiye kya aankh manind-e-habab
turfat-ul-ain aah mit jaate hain ham
chhedne se zulf ke uljho na tum
pad gaya hai pech suljhate hain ham
garche hain darvesh lekin ai falak
tujh ko khatir men nahin laate hain ham
niim naan ke vaste kab juun hilal
tere aage haath phailate hain ham
gulshan-e-duniya hai nairangi ke saath
aur kuchh us ki ravish paate hain ham
kab ba-rang-e-bu-e-gul bahar saba
apne jaame se nikal jaate hain ham
jis qadar haan dekhte hain odhna
paanv yaan utne hi phailate hain ham
kya karen kis se kahen na-char hain
dil ki be-tabi se ghabrate hain ham
koi bhi itna nahin kahta ‘nasir’
sabr kar zalim use laate hain ham