chand suraj shafaq kahkashan ḳhatm-shud
ab uḌuun kis taraf asman ḳhatm-shud
regzar-e-yaqin ta-ba-hadd-e-nazar
sabza-zar-e-ḳhayal-o-guman ḳhatm-shud
phir hua yuun ki aankh ek dam khul ga.i
muḳhtasar ye ki bas dastan ḳhatm-shud
fikr ke saare gul-buTe murjha ga.e
zehn ki saari shadabiyan ḳhatm-shud
us ne aate hi sab khiḌkiyan khol diin
daf.atan sar men tha jo dhuan ḳhatm-shud
rishte-nate sabhi juun ke tuun hain magar
ik taqaddus jo tha darmiyan ḳhatm-shud
zehn ko ab nichoḌun to Tapke ghazal
thi kabhi vo jo tab-e-ravan ḳhatm-shud
Leave a Reply