hai jumbish-e-mizhgan men tiri tiir ki avaz
is tiir men hai said ki takbir ki avaz
mushtaq huun tujh lab ki fasahat ka va-lekin
‘ranjha’ ke nasibon men kahan hiir ki avaz
tu khusrav-e-khuban hai ki le hind siin ta rome
pahunchi hai tire husn-e-jahangir ki avaz
hairat ke maqamat men qanun-e-nava nahin
hai saz-e-khamoshi lab-e-tasvir ki avaz
divane kuun mat shor-e-junun yaad dilao
hargiz na sunao use zanjir ki avaz
piita huun judai men tiri ghunt lahu ki
sun ghuncha-dahan ashiq-e-dil-gir ki avaz
ai jan-e-‘siraj’ aa ke patangon ki khabar liyo
sun jaao mire nala-e-shab-gir ki avaz
Leave a Reply