chand phir taron ki ujli rezgari de gaya
raat ko ye bhiik kaisi ḳhud bhikari de gaya
Tankti phirti hain kirnen badalon ki shaal par
vo hava ke haath men goTa kanari de gaya
kar gaya hai dil ko har ik vahime se be-niyaz
ruuh ko lekin ajab si be-qarari de gaya
shor karte hain parinde peḌ kaTta dekh kar
shahr ke dast-e-havas ko kaun aari de gaya
us ne ghayal bhi kiya to kaise patthar se ‘nasim’
phuul ka tohfa mujhe mera shikari de gaya
Leave a Reply