Chand Ko Talab Mujhko Khwab Wapas Kar diya

Abbas Tabish

chand ko talab mujh ko khvab vapas kar diya

din-dhale suraj ne sab asbab vapas kar diya

is tarah bichhda ki agli raunaqen phir aa gaiin

us ne mera halqa-e-ahbab vapas kar diya

phir bhatakta phir raha hai koi burj-e-dil ke paas

kis ko ai chashm-e-sitara-yab vapas kar diya

main ne ankhon ke kinare bhi na tar hone diye

jis taraf se aaya tha sailab vapas kar diya

jaane kis divar se takra ke laut aai hai gend

jaane kis divar ne mahtab vapas kar diya

phir to us ki yaad bhi rakkhi na main ne apne paas

jab kiya vapas to kul asbab vapas kar diya

iltijaen kar ke mangi thi mohabbat ki kasak

be-dili ne yuun gham-e-nayab vapas kar diya