Nazeer Qaisar
chand ko puura hone do
bahti nadi ko sone do
shaam ki tarah udasi ko
aur bhi gahra hone do
kisi diye ke saa.e men
asman ko sone do
sapna agar ugana hai
jagti ankhen bone do
aao lipaT ke so jaa.en
jo hota hai hone do
ujle tan ki lahron men
raat ke rang samone do
umr ki saada Dori men
saare phuul pirone do
patthar hota jaata huun
hansne do ya rone do
tum men jaag raha huun main
mujh ko ḳhud men sone do
Leave a Reply