Har Roz Hi Din Bhar Ke Jhamelon Se nimaT Ke

Basheer Munzir

har roz hi din bhar ke jhamelon se nimaT ke

ro lete hain ham raat ke anchal se lipaT ke

ham kaun hain kyuun baiThe hain yuun rahguzar par

puchha na kisi ik bhi musafir ne palaT ke

kya kya the mire dil ke sahife men mazamin

dekhe na kisi ne mire auraq ulaT ke

phirte rahe avara ḳhayalat ki surat

kya chiiz thi ham jis ke liye dahr men bhaTke

shab karvaTen lete to na guzre kabhi ‘munzir’

so jaao miyan dard ki bahon men simaT ke