chamakti vusaton men jo gul-e-sahra khila hai
koi kah de agar pahle kabhi aisa khila hai
azal se gulshan-e-hasti men hai maujud bhi vo
magar lagta hai jaise aaj hi taaza khila hai
baham kaise hue hain dekhna khvab aur khushbu
guzarte mausamon ka akhiri tohfa khila hai
lahu men ik alag andaz se mastur tha vo
sar-e-shakh-e-tamasha aur bhi tanha khila hai
kahan khak-e-madina aur kahan khakistar-e-dil
kahan ka phuul tha lekin kahan par aa khila hai
kabhi dil par giri thi shabnam-e-ism-e-mohammad
miri har saans men kaliyon ka majmua khila hai
yahi rauzan banega ek din divar-e-jan men
mire dil men nidamat ka jo ik lamha khila hai
yahin tak laai hai ye zindagi bhar ki masafat
lab-e-dariya huun main aur vo pas-e-dariya khila hai
bikharta ja raha hai duur tak rang-e-judai
‘zafar’ kya puchhte ho zakhm-e-dil kaisa khila hai