chamakti os ki surat gulon ki aarzu hona
kisi ki soch men rahna kisi ki justuju hona
vo patthar hai pighalne men zara sa vaqt to lega
abhi mumkin nahin hai us se koi guftugu hona
use men dekhta ja.un kahan ye baat ankhon men
nahin asan suraj ke musalsal ru-ba-ru hona
use aata hai lamhon men bhi apne aks ko bharna
na hona paas lekin phir bhi mere chaar su hona
tumhari yaad ki barish barasti hai mire dil par
miri ankhon ko aata hi nahin hai be-vazu hona
lahu men bo gaya hai qatra qatra sainkḌon kanTe
hari rut men bhi mere sehn-e-gul ka be-numu hona
Leave a Reply