Farah Rizwi
chalo sabil karen us ko ja manane se
ḳhushi ko giit mayassar nahin zamane se
sukut aisa samar-bar to kabhi na hua
gul-e-malal jhaḌa ab ke shaḳhsane se
tumhara qurb hatheli pe ret jaisa hai
hava ke saath bikharta hai ik bahane se
ham apne bas men jabinon ke bal nahin jaate
hamen charagh bulate hain astane se
vo dil ke saath ulajhti hui kaman-e-talab
vo ek tiir uchaTta hua nishane se
hamare zaḳhm tamasha nahin hain hairat hain
so is liye bhi chhupate hain ik zamane se
Leave a Reply