chal paḌe ham dasht-e-be-saya bhi jangal ho gaya
ham-safar jab mil ga.e jangal men mangal ho gaya
main tha baghi ḳhushk qatra badalon ke des ka
sang-dil lamhon se Takraya to jal-thal ho gaya
haan utar aati hain is vaadi men pariyan chand ki
kahte hain ik ajnabi sayyah pagal ho gaya
ras bhari barsat men khilne laga dharti ka ruup
jism ka akash us ḳhushbu se bekal ho gaya
duur khiski ja rahi hai paanv ke niche zamin
sar ke uupar asman a.ankhon se ojhal ho gaya
kitne qarnon ne tarasha us but-e-bedard ko
kitni naslon ka lahu us jism men hal ho gaya
umr bhar donon ko qaid-e-bahami ki di saza
vo jo ighva ka muqadma tha so faisal ho gaya
har nafas hai sang-bari dil ke kachche ghaav par
lamha lamha zindagi ka kitna bojhal ho gaya
Leave a Reply