Chal Aa Ki Dahr Se Kizb-O-Riya Kashid Karen

Syed Zamin Abbas Kazmi

chal aa ki dahr se kizb-o-riya kashid karen

kisi ke jurm se apni saza kashid karen

chal aa ki ham bhi chalen paar is adam ke kahin

ḳhala ko ḳhaam bana.en hava kashid karen

ham aise ḳhana-ba-doshon ki kya haden hongi

jo vaqt zehn men rakh kar jagah kashid karen

chal apne chhoTe se gham ko baḌhava dete rahen

phir us ke pahlu se karb-o-bala kashid karen

hamen samajhne parakhne men log lag to ga.e

nahin hai vasf koi bhi to kya kashid karen

chal aa bashar ko kisi vasvase men jhonk den aur

usi se ḳhauf bana.en ḳhuda kashid karen