chain ghar men na kabhi tere nagar men pa.un
ḳhud ko har lamha main ik lambe safar men pa.un
koi avaz na saaya na hava men halchal
mo’tariz soch men kya baiTh ke ghar men pa.un
tu kabhi phuul kabhi chandni tha mere liye
ab tujhe pairhan-e-barq-o-sharar men pa.un
main kahin jism kahin aur miri ruuh kahin
ḳhud ko bikhra hua har rahguzar men pa.un
mujh se har lamha koi jurm naya hota hai
ik na ik hadisa har taaza ḳhabar men pa.un
main gavahi pe to tayyar huun ḳhud apne ḳhilaf
vaq.at-e-adl jo munsif ki nazar men pa.un
Leave a Reply