dil hi ada kare to kare dil ke vajibat
ankhon se tai na honge dilon ke muamlat
mahrumiyon ne dil ki tamanna.en chhin liin
bachchon ne karne chhoḌ diye hain mutalibat
go zindagi guzar rahe hain sabhi magar
hasil kisi-kisi ko hain is ke lavazimat
logon ne apni zaat se mansub kar liye
main ne raqam kiye the faqat apne vaqi.at
bar-e-gham-e-hayat vahi ka vahi raha
ham ne ghaTa ke dekh liin apni zaruriyat
ankhon ke raste kabhi mahmud ban ke aa
muddat se muntazir hai mire dil ka somnat
logo tumhare husn-e-muravvat ko kya hua
mizan-e-zar men taul rahe ho ta.alluqat
anjam ek sa hai vo ‘nusrat’ ho ya ki ‘mir’
zarre ko hai sabat na ḳhurshid ko sabat
Leave a Reply